PROVINCE OF BOHOL-Nagmalampuson ang gihimo nga buy-bust operation sa mga sakup sa kapulisan sa Dauis Municipal Police Station batok sa usa ka ex-convict na tigpayuhot og ginadiling drugas sa Purok 5, Barangay Mayacabac, lungsod sa Dauis, probinsya sa Bohol, Pebrero 18, 2024.
Giila ang suspetsado sa Dauis Police Station nga si Guardson Abila Binarao, hingkod ang pangidaron, taga San Isidro District, siyudad sa Tagbilaran, Bohol.
Nakuha gikan sa suspetsado ang binultong shabu nga gibana-banang motimbang ug anaa sa 2.15 kilos nga adunay standard drug price nga P14, 620,000.00.
Gitino ni Police. LT Thomas Zen B. Cheung, hepe sa kapulisan sa Dauis, nga gipaubos nila sa surveillance ang maong suspek sa kapin sa duha ka semana human nila madawat ang impormasyon sa iligal nga kalihukan.
Nasayran nga nadakpan usab niadtong 2016 ang suspek tungod gihapon sa illegal nga drugas apan kasamtangang nabuhi-an human kini mipaubos sa plea bargaining agreement.
Sa pagkakaron giandam na sa buhatan sa kapulisan sa Dauis MPS ang tukmang kaso batok sa suspetsado ug gisusi usab kung si kinsa ang tig supply niya og ginadiling drugas.
Ang maong kalampusan, gumikan sa hiniusang pwersa sa MDET sa Dauis nga gipanguluhan sa hepe sa kapulisan sa Dauis, giubanan sa nagdumala sa operatiba sa punuang buhatan nga si PLT.Col. Joemar S. Pomarejos, C, PIU, ubos sa lig-ong liderato ni PCOL LORENZO A. BATUAN, Direktor sa kapulisan sa naasoy nga probinsya.
