PROVINCE OF BOHOL-Patay sa mga kamot sa tropa sa gobyerno ang pinakataas nga Lider sa NPA sa Bohol nga giilang si Domingo Jaspe Compoc aka ‘Silong’, uban sa laing upat ka miyembro sa Bohol Party Committee sa NPA, lakip niini ang usa ka abogada sa Sugbo nga giila nga si Hannah Jay A. Cesista, alyas Maya o Lean, miyembro sa Anakbayan Cebu.
Nahitabo ang engkwentro sa dihang gilusad sa hiniusang pwersa sa Bohol Police Provincial Office ug 47th Infantry Battalion ang Joint Enhanced Military Police Operation batok sa nahisgutang grupo sa Brgy Campagao, Bilar, Bohol.
Gani sa miulbo nga engkwentro niadtong Pebrero 23, miresulta sa kamatayon sa lima ka terorista sa NPA ug pagkarekober sa unom ka armas lakip ang usa ka M653 assault rifle; usa ka R4 assault rifle; usa ka M16 rifle; ug tulo ka Calibre .45 nga pistola.
Nasayran usab nga daghang kaso ang giatubang ni Domingo Compoc lakip na niini ang rebellion, homicide, attempted homicide, multiple murder, frustrated murder, ug robbery.
Subay niini, si Lieutenant General Benedict M Arevalo, ang Commander sa Visayas Command midayeg sa mga tropa ug mideklarar nga ang pinakaulahing engkwentro sa CPP-NPA usa ka tin-aw nga pagpakita sa ilang hugot nga pasalig sa pagtuldok sa lokal nga komunistang armadong panagsangka sa rehiyon sa Visayas.
Dugang pa niini, naglaum kini nga magpadala og mensahe sa pipila ka nahabiling miyembro sa CPP-NPA nga nagtago-tago pa sa mga komunidad gawas sa rehiyon.
Gitataw sa opisyal nga ang pinakaulahing kalampusan nagagikan sa aktibong suporta sa katawhan ug sa lig-on nga bugkos sa kooperasyon sa nagkalain-laing ahensya sa gobyerno, ilabi na sa kapulisan nga mao’y ilang lig-ong kaabag sa pagsiguro sa kaluwasan ug seguridad sa mga lungsuranon sa tibuok Visayas region.
Hinungdan nga ang armadong kusog sa Pilipinas dili mohunong ug magpadayon sa paggukod hangtod nga mahatagan og hustisya ang tanan nilang gibuhat nga nahimo batok sa nasud ug katawhan.
