Nanawagan ang Cebu Provincial Board sa mga lokal nga gobyerno nga sigurohon ang suplay sa tubig ug protektahan ang mga huyang nga komunidad sa dili pa mograbe ang epekto sa El Niño nunot sa gilaumang pag-igo sa hulaw sa Sugbo.
Pinaagi sa usa ka resolusyon nga gisang-at ni Fourth District Board Member Nelson Mondigo ug giaprobahan atol sa regular session sa provincial board, nga naghangyo sa mga component cities ug munisipyo nga dugangan ang pagpangandam alang sa taas nga hulaw.
Kini nahitabo samtang ang probinsya nag-alayon sa mga pagpangandam alang sa nagkakusog nga El Niño, nga mahimong makaapekto sa supply sa tubig, produksiyon sa agrikultura, pangisda, suplay sa pagkaon ug panglawas sa publiko sa umaabot nga mga bulan.
Ubos sa resolusyon, ang mga lokal nga gobyerno giawhag sa pag-ila sa mga komunidad nga nameligro sa kakulang sa tubig, pagpanalipod sa kasamtangan nga mga tinubdan sa tubig ug pagtukod og alternatibong mga kahikayan sa suplay alang sa mga lugar nga mahimong mag-atubang sa grabe nga kakulangon.
Samtang, giila ni Bohol Governor Erico Aris Aumentado nga ang seguridad sa pagkaon nga gihulagway pinaagi sa kabuhong ug igong suplay sa pagkaon mao ang yawe ug pundasyon sa pagkab-ot sa kalamboan nga makaabot sa tanang Bol-anon.
Sa pakigpulong niini atol sa State of the Province Address (SOPA), gidayeg sa Gobernador ang publiko sa ilang partisipasyon sa pagpalig-on sa sektor sa agrikultura ug kalasangan, mga inisyatibo nga gitumong aron mahimong mas produktibo, lig-on, ug konektado sa merkado ang mga mag-uuma ug mangingisda.
Gihimug-atan usab niini nga ang pagpangandam og sayo, paglihok sa hustong panahon, ug pagpanalipod sa atong katawhan, kini nahimong nag-unang adbokasiya ug tawag sa aksyon sa probinsya kalabot sa panginabuhian sa nagkalain-laing sektor.
