CEBU CITY-Magpahigayon og imbestigasyon ang Department of Education 7 sa usa ka public high school teacher sa dakbayan sa Sugbo kinsang nalambigit sa viral video nga nagpakita og physical assault sa usa ka junior high school student.
Mipasalig ni DepEd 7 Director Salustiano Jimenez, nga kung unsa man ang niresulta sa ilang desisyon human sa ilang imbestigasyon mamahimong ‘fair and just’ alang sa mga hingtungdan.
Kahinumduman nga mikatap ang maong video niadtong Pebrero 16 apan, walay pormal nga reklamo nga nadawat ang iyang buhatan gikan sa ginikanan o inahan sa estudyante nga nalambigit sa maong insidente.
Gani, giklaro ni Jimenez nga dili lang sila maka-isyu og suspension o susamang silot ngadto sa magtutudlo nga walay pormal nga imbestigasyon apan, mamahimong mosumiter og pormal nga reklamo ang ginikanan sa biktima arun mapadali ang pag-uswag sa imbestigasyon.
Subay niini, base sa pasiunang report, ang magtutudlo naningkamot sa pagdisiplina sa estudyante ug nasuko kini tungod sa pagka-absent sa estudyante sa klase ug sa iyang pagkadiskubre sa daghang piercing sa dunggan sa estudyante.
Ug gikataho nga misukol ang estudyante ug masupilon nga mitubag, hinungdan nga giisa sa magtutudlo ang kamot ug gipatiran ang estudyante base usab sa naasoy nga video.
Nasayran nga human nga gi-upload sa inahan ang video ug nag-viral, hinungdan nga usa sa mga rason nga wala na mipatim-aw ang estudyante tungod sa kaulaw.
Hinungdan nga nanawagan si Jimenez sa mga ginikanan nga kung mahimo dili lang mo post dayun sa social media, ug ipaabot na kini sa ilang buhatan arun mahimoan og tukmang solusyon ug aksiyon sa saktong proseso.
Kay inay nga makatabang, nakahatag na hinuon og emosyonal nga kadaot sa bata ang maong panghitabo.
