Gisubay na sa mga awtoridad ang gigikanan ug network sa distribusyon sa 41 ka kilo sa gituohang shabu nga nagkantidad og P278.8 milyon, nga nasakmit gikan sa usa ka driver sa habal-habal sa Barangay Mabolo, Cebu City, niadtong Oktubre 11.
Matod ni PDEA-7 Acting Assistant Regional Director Thessa Tiuzen, ang suspek nga nailhan sa alyas nga Erwin miangkon nga nagdala siya og SUV nga adunay sulod nga ilegal nga droga sakay sa usa ka roll-on/roll-off (RORO) nga barko ug gituohan nga gikan kini sa Mindanao. Ingon man nga wala pa matino sa mga awtoridad kung asa nga pantalan sa Cebu niabot ang maong sakyanan.
Gibutyag ni Tiuzen nga ang pagkaputos niini, nga migamit og mga pakete sa Chinese tea, nagpakita nga posible nga gikan sa gawas sa nasod ang maong droga.
Giangkon usab sa suspek nga gibayran siya og P10,000 matag semana sa iyang kontak alang sa malampusong mga delivery. Diin usa sa mga giingong lugar nga ihulog ang droga mao ang Barangay Duljo-Fatima, samtang ang nahabilin nga suplay giingong gitagana alang sa ubang mga lugar sa Visayas.
Sa pagkakaron, gitun-an usab sa PDEA-7 ang mga kauban sa suspek ug ang mga giingong modawat sa droga isip kabahin sa nagpadayon nga imbestigasyon ug posibleng mga follow-up nga operasyon, ug ipailalom usab sa forensic examination sa mga awtoridad ang cellphone nga nakuha gikan sa suspek aron makatabang sa pag-ila sa giingong supplier ug uban pang mga tawo nga nalambigit. via Bombo George Lastimosa
