Malampuson nga nasunog ang kapin sa P676.6 milyon nga kantidad sa mga iligal nga droga diin gipangulohan sa Philippine Drug Enforcement Agency Regional Office 7 (PDEA-7) atol sa drug destruction activity nga gihimo gahapong adlawa, Hulyo 28, sa Cosmopolitan Funeral Homes Inc. sa Junquera Street, Cebu City.
Ang kalihokan gipangunahan ni PDEA Director General USEC. Isagani R. Nerez, uban sa mga opisyal sa PDEA ug ubang mga ahensya. Ingon man nga mitambong usab si Cebu City Councilor Paul Labra III isip representante ni Mayor Nestor D. Archival, nga maoy Chairman sa Regional Peace and Order Council 7 (RPOC-7).
Basi sa rekord sa PDEA-7, ang mga gisunog nga kontrabando adunay kinatibuk-ang kantidad nga P676,659,213.84. Lakip niini ang 99.45 ka kilo sa shabu, 1.25 ka kilo sa marijuana, 1.29 ka kilo sa marijuana (gross weight), 8.4 mL nga nalbuphine, 18.18 ka gramo sa ephedrine, ug mga expired nga tambal.
Matud pa sa PDEA-7, kini maoy usa sa pinakadako nga illegal drugs destruction activity nga ilang gipahigayon sukad pa niadtong 2017, nga nagpakita sa padayon nga kampanya sa gobyerno batok sa iligal nga droga ug sa lig-on nga koordinasyon tali sa PDEA, hudikatura, ug lokal nga panggamhanan aron masiguro ang husto ug luwas nga pagsunog sa mga nasakmit nga iligal nga droga. via bombo Rocky Lavarez
