MOALBOAL CEBU-Gidakop ang usa ka 36-anyos nga lalaki pipila ka oras human siya gitumbok nga suspek sa pagpatay sa 75-anyos nga biyuda sa lungsod sa Moalboal, Cebu Lunes, Marso 4, 2024.
Matod sa mga otoridad nasikop si Reno Tereso sa Purok Malubgas duol sa usa ka mall sa maong lungsod pasado alas 7 sa gabii o mga 2 ka oras dihang nakit-an ug gi-report ang lawas sa patay nga babaye.
Giangkon sa suspek nga miputol sa ulo, kamot ug tiil sa usa ka senior citizen sa lungsod sa Moalboal nga wala na kini nakahunahuna ug tarong ug susama ug nayawaan na kini samtang gihimo ang lino-og nga krimen.
Sa eksklusibong pakighinabi sa Bombo Radyo kang Reno Arcelo Tereso alyas Botyok, gisaysay niini nga permi nang masuko kaniya ang biktima nga si Gomersinda Deniega Avenido, 75-anyos, kay papahawaon siya sa gipuy-an.
Dugang pa niini, nga mao kini ang hinungdan nga nagkagot siya ug nahimo ang maong krimen.
Asoy pa sa suspek nga hilabihan ang iyahang pagmahay ug konsinsiya karun nga iyaha tung nabuhat, ug iyahang gitumbok nga natintal siya sa ‘demonyo’ kay nagpadala siya sa kalagut atung panahona.
Sa pika bahin, Matod ni Police Captain Claudio Gako, hepe sa Moalboal Police Station, nga nakadawat sila og report bahin sa lawas sa usa ka patay nga babaye nga gitigbas pasado alas 5 sa hapon.
Hinungdan nga ilahang giadto ang dapit sa Purok Malubgas diin ilang nakaplagan ang lawas sa usa ka 75-anyos nga biyuda, nga wala nay ulo ug naputol ang duha ka kamot, nga naa sa kasagbutan ug gitabonan sa tarpaulin ang iyang lawas.
Aduna usab siyay mga samad tinigbasan sa pipila ka bahin sa iyang lawas.
Matud pa ni Gako nga sa wala pa mahitabo ang hacking, nagkalalis ang biktima ug ang suspek.
Dugang pa, nga positibong giila sa mga saksi nga si Tereso ang naghimo sa krimen.
