CEBU CITY-Nidonar og 15,000 kilos nga kamatis ang usa sa ka mag-uuma sa dakbayan sa Sugbo human nga naapektuhan ang iyang mga pananom sa El Nino phenomenon.

Una niini, si Cebu City Councilor Jun Alcover, ang chairman sa committee on agriculture, niingon nga ang mga kamatis alang sa exportasyon apan tungod sa grabeng kainit, wala kini motubo ug wala makapasar sa standards sa mga konsumidor.

Kini tungod sa kakuwang sa tubig, busa dili na kini mabaligya.

Ug nasayran nga moabot sa kapin P300,000 ang alkansi ni Emelio Secretaria, ang mag-uuma sa Sudlon II apan dili gihapon kini niya ibaligya sa ubos nga presyo tungod kay mas dako ang iyang maalkansi tungod mobayad pa kini og tawo arun moani ug mobaligya niini.

Gipaambit ni Secretaria nga iyang gihimong positibo ang negatibo nga nahitabo sa iyang mga pananom ug matod pa nga malipayon kini nga gipaambit sa mga tawo kaysa mausik ug malabay lang.

Daghan usab ang personal nga mibisita sa iyang farm diin usa sa iyang mga gikalipay taliwa sa nahiaguman niini nga pagkalugi.