MANDAUE CITY, CEBU-Hugot ang pagpatuman sa truck ban diin usa sa mga gipanglantawan nga solusyon arun mamenosan ang kahuot sa trapiko sa UN Avenue sa dakbayan sa Mandaue.
Kini tungod nabantayan sa kapitolyo sa Sugbo nga ang mga trailer truck nga motadlas sa maong lugar nakatampo sa kahuot sa trapiko tungod kay wala na kini motuman sa truck ban.
Gitugutan lang ang mga dagkong truck nga magbiyahe subay sa lugar gikan sa alas 9 sa gabii hangtod alas 5 sa buntag.
Gihimo kini sa usa ka panagtigom sa kapitolyo nga gitambongan sa mga mahinungdanong opisyal sa dakbayan sa Mandaue, Department of Public Works and Highways (DPWH), Traffic Enforcement Agency of Mandaue (TEAM), ug mga tag-iya og lote duol sa UN Ave. ug DM Cortes Street.
Nakasabutan sa maong panagtigum nga ang mga trailer truck gikan sa Mandaue gidid-an sa pag-agi sa roundabout nga gibutang sa tiilan sa Marcelo Fernan Bridge.
Hinuon, ibalhin sila sa alternatibong rota sa Butuanon River paingon sa Cansaga Bridge sa Consolacion.
Manggihatagon usab ang mga tag-iya sa yuta sa maong dapit nga miuyon sa pagdonar sa ilang mga kabtangan matag usa nga labing menos 200 square meters, aron mapadali ang pagpalapad sa roundabout.
Gani, mipasalig ang mga kompanya sa telekomunikasyon ug utility sa pagbalhin sa ilang mga poste ug istruktura sulod sa apektadong lugar.
