Gikalipay ni Senador Risa Hontiveros ang lakang sa Office of the Ombudsman sa pagkiha nila ni kanhi Department of Health (DOH) Secretary Francisco Duque ug Procurement Service-Department of Budget and Management (PS-DBM) Undersecretary Lloyd Christopher Lao sa korte human makakita og ‘probable cause’.
Kini may kalambigitan sa kasong graft sa giingong illegal nga pagbalhin sa P41.46 bilyones sa pagpalit sa COVID-19 supplies ug equipment niadtong 2020 atol sa pagtumaw sa pandemya.
Matod ni Hontiveros, ang ilang reklamo nga gisang-at ni kanhi senador Richard Gordon batok kang Duque, Lao ug uban pang mga opisyal sa DOH resulta sa ilang imbestigasyon sa Senado.
Gitataw sa senador, kining lakang sa ahensya usa usab ka pasidaan sa mga kurakot nga opisyal sa gobyerno nga naihap na ang ilang malipayong mga adlaw.
Tungod niini, gipasalamatan ni Hontiveros ang Ombudsman sa matinud-anong pagtuman sa ilang mandato sa pagpangita og hustisya, ilabi na sa mga kaso nga naglambigit sa sayop nga paggamit sa pundo sa publiko ug mga anomalya sa pagpamalit.
Matod niya usa usab kini ka kadaugan sa mga Pilipino nga nag-antos ug nahiangay lamang sa limitado nga hinabang sa panahon sa kataas sa pandemya, ilabi na sa mga healthcare workers nga nag-antos sa nalangan nga special allowance ug hazard pay.
Nanghinaot si Hontiveros nga magpadayon ang pagkab-ot sa hustisya alang sa katawhan.
