Gitugotan sa Upper House nga makatambong si Senador Ramon ‘Bong’ Revilla Jr., pinaagi sa online o virtual sa mga sesyon sa Senado.
Una nang nangayo og konsiderasyon ang pipila ka mga senador nga tugotan ang virtual attendance ni Revilla sa mga sesyon sa Upper House tungod kay nihubag ug nibuka ang iyang samad nga mugna sa operasyon ni Revilla.
Kahinumduman nga si Revilla bag-o lang nagpa-opera sa achilles tendon repair.
Kalabot niini, nihimo og mosyon si Senador Imee Marcos nga suspensuhon una ang mga lagda sa Senado aron tugotan ang virtual nga pagtambong ni Revilla sa sesyon hangtod nga moarang-arang na ang iyang kahimtang.
Tungod kay basi sa lagda sa Senado, ang virtual attendance sa mga senador sa sesyon mahimo lamang kung ang usa ka senador adunay COVID-19 ug uban pang makatakod nga sakit.
Gisuportahan kini ni Senador Chiz Escudero dungan sa pagsugyot sa Senate Committee on Rules nga i-review kining lagda sa Senado.
Human ang mga senador nagkahiusa sa pagbotar pabor nga ilibre si Revilla sa maong lagda.
Subay niini, dako og pasalamat senador sa gihatag nga konsiderasyon kaniya.
