Nanumpa isip bag-ong Senate President Pro Tempore ug modawat sa papel sa Acting Senate President si Senador Win Gatchalian atol sa sesyon sa Senado gahapong adlawa, puli kang Senador Loren Legarda.
Kini human sa wala damhang pagtambong ni Senador Francis “Chiz” Escudero nga misangpot sa pagkausab sa liderato sa Senado.
Apan, nagpabilin nga kuwang og usa ka miyembro ang Senado sa gikinahanglan nga quorum aron makapili og bag-ong Senate President.
Apan, wala nagpakahilom si Senador Alan Peter Cayetano gumikan gibarugan niini nga siya gihapon ang lehitimong Presidente sa Senado.
Dugang ni Cayetano nga 13 ka boto ang gikinahanglan alang sa bisan unsang pagbag-o sa liderato sa Senado, ug iyang gisaway ang pipila ka mga lakang sa iyang mga kaubang senador nga iyang giingon nga mahimong makatuis sa proseso sa Konstitusyon.
Gipasalig usab ni Cayetano nga andam siya nga mokanaog sa pwesto kung kini ang desisyon sa mayoriya, basta moagi kini sa hustong proseso ug subay sa balaod.
Samtang, nihatag og pahayag si Palace Press Officer Usec. Claire Castro kalabot sa pagkapili kang Sen. Win Gatchalian isip Senate President Pro Tempore.
Matod sa Malacañang, ang nahitabo sa Senado anaa sa balangkas sa balaod ug sa prinsipyo sa rule of law, busa giila niini ug gitahod ang desisyon sa bag-ong mayorya ug ang liderato ni Gatchalian.
Subay niini, sa bag-ong liderato gimando sa tanang trabahante sa Senado ang work-from-home (WFH) arrangement karng adlawa, Hunyo 4, nunot sa bag-ohay nga mga panghitabo sa Upper House nga gikataho nga nakaapekto sa operasyon ug moral sa mga empleyado.
