Gilatid ni kanhi Supreme Court Chief Justice Antonio Carpio ang mga mosunod nga lakang nga posibleng buhaton sa Pilipinas human gi-hijack sa mga pwersa sa China ang mga bangka sa Pilipinas sa Ayungin shoal sa West Philippine Sea niadtong Lunes, Hunyo 17.
Girekomendar ni Carpio nga usbon ang presensya sa mga tropa sa nasud gikan sa Ayungin shoal gikan sa military ngadto sa civilian ug magtukod og parola nga operahan sa Philippine Coast Guard (PCG) sa maong shoal, ingon man ang pagbutang og substation ug research center sa UP.
Ingon man ang pag-adjust sa resupply mission ug gidasig ang mga awtoridad nga mogamit og mas paspas nga resupply vessels, ipadayon ang pagdili sa paggamit og armas sa mga komprontasyon ingon man ang pagdili sa pagdala og hait nga hinagiban aron malikayan ang tensiyon.
Pagpasabot ni Carpio nga wala’y hurisdiksyon ang international tribunal sa mga kalihukang militar.
Busa miingon kini nga ang teknikal nga problema kinahanglan nga masulbad sa dili pa ang nasud mopasaka og bag-ong kaso batok sa China sa Permanent Court of Arbitration sa The Hague, Netherlands.
Bisan pa nga ang China mahimong mosulay sa pagpahunong sa pagtukod sa usa ka sibilyan nga kapuli sa PH’s beached BRP Sierra Madre military outpost sa Ayungin shoal, si Carpio miingon nga ang Pilipinas mahimong modangop sa tribunal ug iingon nga usa kini ka civilian activity.
Dugang pa niya nga mahimo nga hangyoon sa PH ang US nga i-escort ang mga tropang Pilipino nga nadestino sa Ayungin shoal sa mga resupply mission, apan gipahibalo usab ni Carpio nga dili na kini kinahanglan karong panahona.
