Gikondena ni Mandaue City Councilor Carlo Fortuna ang gihimong agresibong aksyon sa China batok sa mga Filipino military personnel didto sa Ayungin Shoal pinaagi sa usa ka resolusyon nga iyang gipasar.
Gipahayag usab ni Konsehal Fortuna ang iyang suporta sa Armed Forces of the Philippines (AFP), sa Philippine Coast Guard (PCG), ug uban pang pwersa sa seguridad nga nanalipod sa soberanong katungod sa nasud ug nagpatuman sa hurisdiksyon niini sa Exclusive Economic Zone (EEZ) sa West Philippine Sea.
Subay niini,niluwat og resolusyon ang maong konsehal nga nagkondena sa iyang gihulagway nga agresibo nga mga aksyon sa China batok sa mga Pilipinong sundalo sa Ayungin Shoal.
Ang maong lakang nagpalig-on sa 2016 Arbitral Award ug nagpahayag sa suporta sa Dakbayan sa Mandaue alang sa mga ahensya sa gobyerno nga nanalipod sa maritime domain sa nasud.
Samtang atol sa pakighinabi ni Fortuna sa mga sakop sa tigbalita, nanawagan usab ang konsehal sa mga lokal nga opisyal ug sa katawhan nga magkahiusa sa pagpakita og suporta sa mga nagbantay sa kaluwasan sa nasod, samtang gipasiugda ang malinawong paghusay sa mga panagbangi pinaagi sa dayalogo, diplomasya, ug pagtuman sa internasyonal nga balaod.
