MANDAUE CITY,CEBU- Gipalig-on sa Mandaue City Police Office (MCPO) ang pagmonitor sa mga pulis nga nadestino sa nagkadaiyang patrol points ug checkpoints pinaagi sa mga cellphone nga konektado sa ilang command center.
Matud ni Police Colonel Cirilo Acosta Jr., city director sa MCPO, adunay 41 ka patrol points, lakip ang checkpoints, beat patrol, mobile patrol ug tactical motorcycle riders, nga gihatagan og cellphone ug load aron maseguro ang komunikasyon sa command center sulod sa 24 oras, lakip na ang mga miyembro sa Special Weapons and Tactics (SWAT).
Pinaagi niini, mas dali nga mamonitor ang kahimtang sa matag lugar ug matubag ang mga panginahanglan sa mga pulis nga anaa sa field.
Gigamit usab sa command center ang 95 ka CCTV camera alang sa mas episyenteng pagmonitor.
Samtang, nakigtambayayong ang MCPO sa Department of Education ug mga pribadong eskwelahan aron mapalig-on ang seguridad sa mga campus pinaagi sa CCTV ug Zoom communication system.
Matud ni Acosta, ang mga eskwelahan maoy mogamit sa kaugalingong cellphone ug internet connection, samtang ang MCPO maoy mogasto sa Zoom aron mapadali ang komunikasyon tali sa mga eskwelahan ug sa command center.
Gikataho nga 83 ka school compounds ang naapil sa maong programa, diin naglihok 24 oras ang CCTV alang sa real-time monitoring.
Dugang pa niini, nagdeploy ang MCPO og 83 ka pulis kada adlaw, sa buntag ug hapon, aron magbantay sa mga eskwelahan.
Gipasabot ni Acosta nga ang mga pulis nga gi-assign sa mga eskwelahan gikan sa administrative duties, busa dili maapektuhan ang regular nga deployment sa kapulisan.
