Gi-isyuhan og citation nga reckless driving ang tulo ka motorista human sila nasakpan nga nag-drag racing sa Ouano Avenue, Mandaue City, niadtong Huwebes sa gabie, September 17.
Kini human nakuhaan sa video sa Task Force City Mayor’s Office – Safety Maintenance Area Response Team (CMO-SMART) ang paspas nga pagpadagan sa mga motorista sa ilang mga motorsiklo, samtang naglumbaanay.
Matod ni Task Force team leader, Gerrard Glenn Soon Gobalani, gibaliwala sa mga motorista ang ilang badlong maong napugos sila sa pag-video niini ug nagpatabang sa TEAM ug Mandaue City Police.
Ang mga nasitang lalaki nga nag-edad og 20-anyos pataas mga residente sa Mandaue ug Lapu-Lapu City, ug niangkon nga sila usab ang tig-drag race sa may roro port sa lungsod sa Cordova.
Kay adunay napakitang lisensya ug papeles, wa ma impound ang ilang nga motor, apan gi-issuehan sila og citation ticket nga reckless driving, ug gipahunong gyud sila sa drag racing.
Dugang ni Gobalani, nga gihugtan nila ang imposer sa mga mag-drag racing base kini sa giluwatan nga Executive Order ni Mandaue City Mayor Jonkie Ouano niadtong Septiyembre 15 nga nagmando og mas estrikto nga pag-dili sa mga mag-drag racing sa kadalanan sa Mandaue City, aron malikayan ang disgrasya.
Makig-alayon usab sila sa LTO-7 aron sa mas lig-on pa nga pagpatuman sa mando batok sa mga maglumbaanay og padagan sa motor ug sakyanan sa bisan asang dapit sa Mandaue City.
