Gihangyo sa Philippine Coconut Authority (PCA) nga usbawan ang pundo alang sa fertilization program ubos sa industriya sa lubi.
Matod ni PCA Admin Dexter Buted, gusto nila nga mapataas ang pundo nga gigahin sa fertilization program gikan sa miaging 1% ug himuong 15%.
Diin katumbas kini sa P2.4 bilyones nga pundo.
Kung gani mahitabo kini, posibleng motaas og 15% ang produksiyon sa industriya sa lubi sulod sa usa ka tuig.
Sa samang higayon, gipasalig usab sa opisyal ang padayon nga pagpananom og dugang mga lubi ubos sa programa niini nga makatanom og 100 milyones ka punoan.
Matod sa PCA, sukad sa paglusad sa maong programa, duha ka milyon ka punoan sa lubi ang natamnan sa maong ahensya, samtang gitakdang mosaka kini og 8.4 milyones ka punoan sa dili pa mahuman ang kasamtangang tuig.
Dugang sa opisyal, padayon nga gitutokan sa ahensya ang produksiyon sa lubi ilabina ug usa kini sa mga dagkong eksport sa Pilipinas.
