Nihinay ang inflation o ang pagtaas sa kinatibuk-ang presyo sa mga palaliton ug serbisyo sa Pilipinas sa buwan sa Hunyo.
Mao kini ang gitaho ni National Statistician ug PSA chief nga si Claire Dennis Mapa nga ang inflation nihinay ngadto sa 3.7% sa miaging buwan, nga nagpakita nga adunay dyutay nga pag-us-os gikan sa 3.9% nga natala niadtong Mayo.
Nagresulta kini sa year-to-date inflation nga 3.5% nga anaa sa target range sa gobyerno alang sa inflation nga 2% hangtod 4% alang sa 2024-2028.
Matod ni Usec. Mapa, ang nag-unang nakatampo sa hinay nga inflation sa miaging buwan mao ang paghinay sa pagsaka sa gasto sa balay, tubig, kuryente, gas ug uban pang produktong petrolyo ug transportasyon.
Bisan pa sa kinatibuk-ang pagkunhod sa inflation rate sa Hunyo human sa 4 ka sunodsunod nga taas nga inflation, asoy ni USec. Mapa nga dili tataw kung magpadayon ang naobserbahan nga hinay nga inflation sa nahabilin nga mga bulan sa 2024.
Kini tungod sa naobserbahang pagsaka sa month-on-month inflation sa heavy-weight Food and Non-Alcoholic Beverages index.
Ang food inflation o paglihok sa presyo sa mga pagkaon nga sagad gipalit sa mga panimalay misaka usab sa 6.5% sa Hunyo gikan sa 6.1% sa Mayo.
Resulta kini sa paspas nga pagsaka sa presyo sa utanon ug karne tungod sa epekto sa pagsugod sa ting-ulan ug mga kaso sa African Swine fever.
Sa laing bahin, sa usa ka pamahayag, si National Economic and Development Authority (NEDA) Secretary Arsenio Balisacan miingon nga sila komitado sa pagpabilin sa inflation rate sa nasud sa target range nga 3% ngadto sa 4%.
Matud usab niya nga ang pakigtambayayong sa gobyerno, stakeholders ug uban pang prayoridad nga sektor magpadayon alang sa pagpatuman sa mga katugbang nga mga inisyatiba aron masiguro nga adunay igo ug barato nga suplay sa pagkaon lakip na ang matag adlaw nga bugas nga gikinahanglan sa matag Pilipino.
