UKRAINE-Miabot na sa Ukraine ang pinakaunang F-16 fighter jets nga gidonar para gamiton sa nagpadayong gubat niini batok sa Russia.
Sa pagkakaron, wala pay kompirmasyon gikan sa gobyerno sa Ukraine mahitungod niini apan ang Lithuanian Foreign Minister Gabrielius Landsbergis unang mipadayag sa pag-abot sa mga donasyon.
Kung kahinumduman, nga ang Lithuanian Foreign Minister maoy usa sa labing inila nga mga tigpaluyo sa Ukraine, bisan sa wala pa ang pagsulong sa Russia sa maong nasod diin ang unang shipment sa F-16 fighter jets ngadto sa Ukraine mao ang una sa kasaysayan sa Ukraine-Russia War.
Daghang mga nasud ang misaad na sa Ukraine aron mahatagan ang ingon nga mga ayroplanong militar lakip ang Denmark nga nagsaad ug 19 ka F-16, 24 gikan sa Netherlands, ug unom gikan sa Norway.
Uban sa pag-abot sa mga fighter jet, daghang mga analista ang nagtuo nga kini mahimong usa ka pagbag-o sa Gubat sa Ukraine-Russia, ilabi na kay ang Ukraine nagsalig gihapon sa mga karaang jet fighter nga gigamit pa sa panahon sa Soviet.
