-- ADVERTISEMENT --

Dili mominos sa 9 ka tawo ang namatay ug labing menos 28 ang naangol human naglusad ang Russia og dakong pag-atake gamit ang mga missile ug drone batok sa Ukraine, nga milungtad og kapin sa 10 ka oras.

Matod sa mga awtoridad sa Ukraine, kapin sa 400 ka drone ug 110 ka missile—lakip na ang 27 ka ballistic missiles—ang gigamit sa maong opensiba.

Lakip sa mga naigo mao ang mga taytayan, imprastraktura sa kuryente, ug mga residential building.

Sa usa ka pahayag, gipunting ni Ukrainian President Volodymyr Zelenskyy nga apil sa gipuntirya ang mga pasilidad nga nagsuplay og kuryente ngadto sa mga nuclear power plant, ug nagkonektar sa power grid sa Ukraine ngadto sa mga silingang nasod sa European Union (EU).

Gikondenar usab ni Zelenskyy ang paggamit sa Russia og mga “cluster warhead,” ingon man ang estratehiya sa sunod-sunod nga pag-atake (double-tap strikes) nga gituyo aron babagan ang mga operasyon sa pagluwas ug pag-ayo sa mga naguba nga pasilidad.

-- ADVERTISEMENT --

Samtang, gikondenar ni NATO Secretary General Mark Rutte ang maong pag-atake, ilabi na nga ang epekto niini nakaabot na hangtod sa teritoryo sa alyansa.

Nanawagan karon si Zelenskyy sa mga kaalyado sa Ukraine nga padalion ang pagpadala og mga air defense system, lakip na ang mga missile nga PAC-2 ug PAC-3, aron mapanalipdan ang nasod batok sa posible pang mga pag-atake.