Mipahimangno ang United States nga mahimong paspas ang pagkagrabe sa panagbangi tali sa Saudi Arabia ug Iran-backed Houthis human unang gitarget sa missile attack ang Riyadh sukad sa pagbalik sa panagbangi sa Yemen.
Nahitabo ang maong pag-atake samtang nagpadayon ang opensiba sa Houthis sa daghang bahin sa Yemen, diin kapin 110,000 ka tawo ang gikatahong nibakwit og puy-anan tungod sa panagbangi, sumala sa UN refugee agency.
Sa Riyadh, nadungog ang kusog nga mga pagbuto ug nakita ang pagkasunog sa usa ka fuel tank nga adunay logo sa Aramco duol sa airport, samtang giingon sa Saudi-led coalition nga malampuson nilang nasagubang ug giguba ang ballistic missile nga gilunsad sa Houthis.
Gipasanginlan usab sa ‘coalition’ ang Houthis sa pagsulay pagtarget sa mga sibilyan ug ‘civilian infrastructure’ sa pipila ka siyudad sa kasadpang bahin sa Saudi Arabia, lakip ang Yanbu nga importanteng oil export hub.
Gikuha sa Houthis ang responsibilidad sa pag-atake, nga matud sa ilang military spokesman naggamit sila og ballistic ug cruise missiles, ingon man drones, aron targeton ang mga sensitibong lugar sa Riyadh ug mga pasilidad sa Aramco sa Yanbu.
Samtang, nagpadayon ang airstrikes sa Saudi Arabia batok sa mga lugar nga kontrolado sa Houthis sa Yemen, samtang mipahimangno ang US State Department sa mga Amerikano nga naa sa gawas sa Middle East nga seryosong hunahunaon pag-usab ang ilang pagbiyahe ngadto o sulod sa maong rehiyon.
