MANILA BAY-Mitaho ang Office of Civil Defense (OCD) nga dul-an sa 900 ka oil spill booms ang gipakatap aron ma-contain ang oil spill gikan sa nalunod nga MT Terra Nova.
Matod sa OCD, ang spill booms nga nahimo tungod sa kooperasyon sa nagkalain-laing ahensya sa gobyerno ug mga boluntaryo gamit ang mga nahipos nga materyales.
Mokabat sa 48 ka teams ang gipakatap sa daghang fabrication sites sa Pampanga Lubao Bamboo Hub ug Tarlac Modern Mechanized Forest Nursery.
Naghimo kini og kinatibuk-ang 885 ka spill boom.
Ang maong spill booms gidala ngadto sa mga probinsiya nga una nga giila nga high-risk sama sa Bataan, Bulacan, ug Pampanga aron mapugngan ang pagkuyanap pa sa lana.
Sa laing bahin, ang Department of Environment and Natural Resources (DENR) mitaho nga aduna kini gahin nga 954 ka kahon sa oil absorbent pads sa DENR Calabarzon.
Una nang nanawagan ang gobyerno sa mga donasyon nga materyales aron mahimo ang mga spill boom sama sa panit sa lubi ug buhok samtang pipila ka mga boluntaryo usab mitanyag og tabang alang niini.
