DAVAO CITY-Gidekarar sa Court of Appeals (CA) sa dakbayan sa Cagayan de Oro nga null and void ang temporary protection order (TPO) nga gihatag ngadto sa Kingdom of Jesus Christ (KOJC), matud ni Solicitor General Menardo Guevarra.
Matod ni Guevarra, nga gimandoan usab sa CA ang korte nga ipasa ang mga rekord sa kaso ngadto sa Quezon City Regional Trial Court subay sa direktiba sa Korte Suprema.
Niadtong Agosto, ang Davao Regional Trial Court (RTC) Branch 15 niisyu og TPO nga nagmando sa Philippine National Police (PNP) sa paghunong sa mga aksyon nga naghulga sa kaluwasan ug seguridad sa mga sakop sa KOJC samtang ang mga pulis misulay sa pagsilbi sa warrant of arrest batok kang Quiboloy.
Niabot ang kamandoan taliwala sa nagpadayong tensyon tali sa KOJC ug PNP samtang ang naulahi nisuway pagsilbi sa mga warrant of arrest batok sa lider niini nga si Apollo Quiboloy.
Giklaro niini sa ulahi nga dili i-nullify sa TPO ang warrant of arrest nga giisyu.
Sa pikas bahin, si Atty. Israelito Torreon, ang legal counsel sa KOJC, niingon nga iyang hangyoon ang CA nga ikonsiderar pag-usab ang desisyon niini.
Dugang ni Torreon nga ang hukom sukwahi sa katuyoan sa usa ka writ of amparo, nga usa ka remedyo nga magamit ni bisan kinsang katungod may kalambigitan sa kinabuhi, kagawasan, ug seguridad.
Samtang ang mga sakop sa relihiyosong grupo mihilak tungod sa giingong pagpangubkob sa Davao regional police sa JMC building nga nahimutang sulod sa KOJC compound.
Kung kahinumduman, nga si Quiboloy nag-atubang og kaso ubos sa Section 5(b) ug Section 10(a) sa Republic Act 7610 o ang Special Protection of Children Against Abuse, Exploitation, and Discrimination Act.
Nag-atubang usab siya og non-bailable qualified human trafficking charge ubos sa Section 4(a) sa Republic Act 9208, as amended, atubangan sa korte sa Pasig.
