Gisaway sa kanhi Presidential Legal Counsel nga si Atty.Salvador Panelo ang legal nga aksyon nga gihimo ni Atty. Israelito Torreon, abogado ni Senador Ronald “Bato” dela Rosa, kalabot sa mga petisyon nga gisang-at batok sa arrest warrant sa International Criminal Court (ICC).
Matod ni Panelo, sayop ang desisyon sa pagsang-at og mga petisyon alang sa writ of amparo, certiorari, prohibition, ug Temporary Restraining Order (TRO) ngadto sa Korte Suprema.
Giingon niya nga ang hustong legal nga remedyo unta mao ang writ of habeas corpus aron direktang kuwestiyonon ang balido sa arrest warrant.
Ang pahayag ni Panelo miabot human gibasura sa Korte Suprema, pinaagi sa boto nga 9-5-1, ang petisyon ni Dela Rosa nga nagtinguha sa pagpahunong sa pagpatuman sa ICC arrest warrant.
Gipasabot ni Panelo nga kon habeas corpus ang gisang-at, mas dali untang matubag sa korte ang isyu sa legalidad sa warrant.
Gipasiugda usab niya nga importante ang hustong paggamit sa legal nga mga remedyo ilabina sa mga kaso nga naglambigit sa internasyonal nga korte ug sa mga katungod sa akusado.
