CEBU CITY- Gipaambit ni kanhi Presidential Chief Legal Counsel ug abogado nga si Salvador Panelo nga, sa iyang pagtan-aw, wala pa mapamatud-i sa prosekusyon ang mga alegasyon batok kang Vice President Sara Duterte sa nagpadayon nga impeachment trial.
Sa pakighinabi sa Bombo Newsteam, matud ni Panelo, ang mga testimoniya sa mga saksi, lakip na ang mga opisyal sa bangko ug sa Commission on Audit (COA), wala makapakita og ebidensiya nga adunay iregularidad sa paggamit sa confidential funds sa Office of the Vice President (OVP).
Gihatagan usab niya og katin-awan nga ang mga paggasto alang sa safe house, mga muwebles, pagkaon, ug medisina mahimong kabahin sa lehitimong paggamit sa confidential funds, basta kini gigamit alang sa gitakdang katuyoan.
Dugang pa niya, wala usab siya mouyon sa argumento nga dili angay hatagan og confidential funds ang OVP, nga iyang giingong gi-aprubahan sa Kongreso human kini gisugyot sa administrasyon.
Mahitungod sa liquidation sa pondo, miingon si Panelo nga kung adunay kantidad nga nagasto nga milabaw sa nadawat nga pondo, dili kini awtomatikong nagpasabot og iregularidad. Iyang gidugang nga posible usab nga adunay kantidad nga giabono sa opisina.
Gipasiugda usab ni Panelo nga ang kinaiya sa confidential ug intelligence funds nagkinahanglan og limitadong pagbutyag sa mga detalye sa operasyon aron dili makompromiso ang seguridad ug ang mga pamaagi batok sa mga hulga sa estado.
Kini nga maong mga pahayag naglangkob sa depensa ug personal nga opinyon ni Panelo atol sa iyang interbyu bahin sa nagpadayon nga impeachment proceedings batok kang Vice President Sara Duterte.
