Gipahayag ni prosecution spokesperson Representative Zia Alonto Adiong nga wala na-establish sa Commission on Audit (COA) nga adunay pagsobra sa gahum o overreach, human nasayran nga ang pipila ka mga aktibidad nga gipresentar sa opisina ni Vice President Sara Duterte gipahigayon sa wala pa gani ma-release ang confidential funds.
Matud pa ni Adiong, kung sundon ang argumento sa kampo ni VP Duterte, mogawas nga gigamit ang pundo isip reimbursement sa mga aktibidad nga nahimo na nga dili gitugot ilalom sa mga lagda.
Dugang pa niya, supak sab sa joint circular ang paggamit sa confidential funds aron pun-an o dugangan ang gastoan alang sa mga empleyado nga daan nang gihimong opisyal sa opisina, pareho sa labaw sa 400 ka miyembro sa Vice Presidential Security Group (VPSG) nga binayran na sa gobyerno.
Gipasabot usab ni Adiong nga ang ordinaryong seguridad, pagpananom og kahoy, ug mga Christmas party pulos mga administratibong kalihokan ug mahimong ipatuman nga walay kompidensyal nga pondo, samtang ang pondo kinahanglan nga ipunting lamang sa mga espesyal nga operasyon ug pagtabang sa PNP ug AFP batok sa mga kriminal ug terorista.
Dugang pasabot ni Adiong, nga hangtod karon, wala pay mga resibo, Official Receipts (OR), o opisyal nga mga invoice nga gisumite o gipakita aron pamatud-an nga ang mga impormante mipili nga modawat og tambal, mga produkto, o uban pang mga probisyon imbes nga kwarta o kompensasyon.
Gitino usab niya ang kalainan tali sa “pagpalit og impormasyon” ug “ganti,” diin ang una wala magkinahanglan og sobra nga dokumentasyon para sa COA tungod kay kini usa ka pagpalit og impormasyon, samtang ang “ganti” kinahanglan adunay lig-on nga ebidensya ug pruweba sa kasaysayan sa kalampusan sa operasyon.
Matod ni Adiong nga gituyo sa depensa nga libugon o sakyan ang duha ka konsepto, mao nga dali nga misupak si Atty. Kapunan tungod kay kini makapahisalaag sa publiko.
Dugang ni Adiong nga ubos sa mga lagda sa COA, hugot nga gidili alang sa usa ka Special Disbanding Officer (SDO) ang pagdelegar o pagbalhin sa iyang mga obligasyon ug pundo ngadto sa laing tawo. Nahitabo kini sa DepEd diin gibalhin ni SDO Fajardo ang ₱500 milyon nga confidential funds ngadto kang Col. Nolasco, ug usab sa OVP diin gibalhin ni SDO Gina Acosta ang ₱125 milyon nga confidential funds ngadto kang Col. Lachica. Tungod sa maong pagbalhin sa pundo, giisip kini sa COA nga “dili regular” ug supak sa due process expenditure.
