Nagtukod ang Philippine National Police (PNP) og mga espesyal nga grupo lakip na ang mga top investigator aron pagpangita sa mga indibidwal nga mitabang sa pagtago sa founder sa KOJC nga si Apollo Quiboloy kinsa nag-atubang og kasong child abuse, sexual harassment ug qualified human trafficking.
Pipila sa mga nag-unang tahas sa team mao ang pagtigom ug pag-verify sa mga post sa social media, publikasyon, ug uban pang impormasyon bahin kang Quiboloy, pag-validate ug pag-authenticate sa maong mga materyales pinaagi sa ACG, pagtigom og mga pamahayag ug affidavit gikan sa mga PNP personnel nga nalambigit sa pag-serve sa warrant of arrest batok kang Quiboloy, pagkuha og mga testimonya gikan sa mga biktima ug mga reklamante ug pagkolekta og mga dokumento nga ebidensya gikan sa ubang mga ahensya nga makapalig-on sa kaso.
Gipalihok usab ang bulag nga tracker team aron pangitaon si kanhi presidential spokesperson Harry Roque nga adunay detention order gikan sa Kamara.
Kini human si Roque gitumbok nga contempt sa ikaduhang higayon human siya nagdumili sa pagsumite sa mga gipangayo nga mga dokumento aron tarungon ang pagbalon sa iyang bahandi nga gipasangil sa ilegal nga POGO.
Sa usa ka pamahayag, si PNP Chief Police Gen. Rommel Marbil nga ipahigayon ang operasyon sa paggukod sa mga coddlers ni Quiboloy ug Roque sa episyente ug subay sa balaod.
Ang hepe sa PNP niingon na nga dili makatago si Quiboloy sa mga awtoridad kung walay motabang kaniya.
Sa laing bahin, si PNP-Criminal Investigation and Detection Group (CIDG) Director Leo Francisco nagtukod usab og special composite team nga gilangkuban sa mga opisyal sa CIDG ug Anti-Cybercrime Group (ACG) aron pasakaan og komprehensibong kaso ang mga tawo nga mitabang kang Quiboloy.
