Natapos na ang imbestigasyon sa mga laing gituohang aktibidad sa POGO sa dakbayan sa Lapu-Lapu partikular na mismo ang narondang Tourist Garden Hotel sa Barangay Agus matod pa ni Lapu-Lapu City Mayor Junard “Ahong” Chan.
Matod pa sa post sa opisyal nga social media account sa Mayor kagahapong adlawa sa Martes, Septiyembre 24, 2024 nga ang maong isyu kay gisagolan na ug pamolitika ug mga dili tinuod nga impormasyon.
Dugang pa sa Mayor nga gipanghimuslan sa lapad nga higayon sa iyang mga kaatbang sa politiko ug mga kritiko ang maong isyu tungod sa nagkadoul sa piniliay sa umaabot Mayo 2025.
Kahinumduman nga anaa sa 169 ka mga langyaw ang “na-rescue” kaniadtong Agosto 31 sa Tourist Garden Hotel compound tungod sa pagpahigayon sa mga ilegal nga scam hubs sulod sa maong dapit.
Mokabat sa 16 ka mga langyaw ug usa ka Pilipino nga giila nga si Zandrew Magdaluyo Cantarona ang gipasakaan og pito ka ihap sa qualified trafficking in persons.
Usa sa langyaw nga dinakpan nga si “Zhao Shouqi” kay aduna pay nasakmit nga City Hall ID isip Consultant sa Chinese Businesses ubos sa Opisina sa Mayor kinsa pinirmahan pa ni Chan.
Daling gihimakak sa Mayor ang maong City Hall ID ug giingong peke kini.
Gipasalig ni Chan nga kini nga mga indibidwal makadawat sa angay nga sangputanan sa ilawom sa balaod.
