Gitaho sa Vietnamese state media ang giingong pag-atake nga nahitabo sa usa ka Vietnamese fishing boat samtang milawig kini duol sa West Philippine Sea.
Basi sa report, napulo ka tripulante sa maong bangko ang naangol diin tulo kanila ang nabali ang mga bukton ug mga bitiis.
Naglawig ang bangka duol sa Paracel Islands sa dihang nahitabo ang pag-atake. Hinuon, wala pa matino kung kinsa ang responsable sa pag-atake.
Ang Paracel Islands nahimutang 400 km sa sidlakan sa Vietnam. Susama usab kini nga gilay-on gikan sa labing duol nga baybayon sa China.
Samtang ang duha ka mga nasud parehong adunay pag-angkon nga maritime feature apan ang China adunay kontrol niini.
Sa pagkakaron, wala pa’y opisyal nga pamahayag ang Vietnam ug China kalabot sa maong insidente.
Ang maritime feature una nang gitigi sa duha ka nasud diin niadtong 1970’s adunay naval conflict tali kanila nga misangpot sa hingpit nga pagkubkob niini sa China.
Sa pagkakaron, ang China adunay gamay nga pantalan sa lugar, lakip ang pipila ka mga building, usa ka helipad, ug usa ka radar.
