Gipapahawa sa Taiwan Coast Guard ang 16 ka mga barko sa China nga naglakip sa mga barko sa coast guard, research, ug mga barkong pangisda human kini naghimo og dungan nga pagpanghasi sa kadagatan.
Sumala sa usa ka pahayag gikan sa Taiwan, kining koordinadong operasyon sa mga barko sa China nahitabo sa palibot sa ilang nag-unang isla ug duol sa gikalalis nga Pratas Island.
Gihulagway sa mga awtoridad sa Taiwan ang mga aksyon sa China isip usa ka matang sa “hybrid warfare” nga gitumong aron usbon ang kasamtangang kahimtang o status quo ug magmugna og sayop nga impresyon nga anaa kanila ang hurisdiksyon ibabaw sa Taiwan Strait.
Dali nga milihok ang mga patrol vessel sa Taiwan aron babagan ug papahawaon ang mga barko nga nakasulod sa ilang gidili nga katubigan.
Kining insidente kabahin sa nagpadayon nga pagdaghan sa presensya sa mga barkong militar ug pangisda sa China palibot sa teritoryo sa Taiwan sa milabay nga pipila ka bulan.
