Gisugdan na usab sa Philippine National Police – Internal Affairs Service (PNP-IAS) ang imbestigasyon sa mga opisyal sa kapulisan nga giingong adunay kalambigitan sa pagpatay kang retired general ug Philippine Charity Sweepstakes Office (PCSO) board secretary Wesley Barayuga.
Matod ni IAS Inspector General Brigido Dulay, magsugod ang imbestigasyon sa mga testimoniya nga gipagawas sa pipila ka mga resource person atol sa pagdungog sa Quad Committee sa House of Representatives.
Dugang pa, nga kini subay sa mga testimonya ni Lt.Col. Santie Mendoza, ang whistleblower nga kasamtangang nagserbisyo ubos sa PNP Drug Enforcement Group (PNP-DEG).
Matod ni Dulay, bantayan usab sa IAS ang mga sunod nga hearing sa komitiba ug kung unsa pa nga impormasyon ang motumaw niini.
Kana gumikan kay, mahimo nilang kuhaon ug gamiton ang mga ebidensya ug testimonya nga ipagawas sa komite sa ilang imbestigasyon.
Dugang ni Dulay, ang imbestigasyon dili lang magtutok sa naunang testimonya ni Col. Mendoza apan tun-an usab ang mga migawas sa imbestigasyon nunot sa pagpatay kaniya.
Unang gimando ni PNP Chief PGen. Rommel Francisco Marbil nga ablihan pag-usab ang kaso ni Barayuga human sa mga pagbuto sa katapusang pagdungog sa Quad Committee sa Kamara.
Dinhi, gitumbok silang kanhi PCSO general manager Royina Garma ug National Police Commission commissioner Edilberto Leonardo nga maoy utok sa pagpatay.
