MANDAUE CITY-Gituki sa kagamhanang lalawigan sa Sugbo ang mas baratong pletehan sa Mactan-Bantayan Island flight nga bag-o lang gi-inugarahan niadtong buwan sa Agosto rong kasamtangang tuig.
Kini ang nahisgutan nila Cebu Provincial Governor Gwendolyn Garcia ug sa kompanya nga nag-operate sa regular flights sa Mactan-Bantayan Island nga Leading Edge Air Services Corporation (LEASCOR).
Matod sa maong panagtagbo nga mihangyo ang gobernadora sa LEASCOR nga ipabilin ang P888 nga pletehan sukwahi sa sugyot sa kompanya sa pagpasaka niini aron sa padayong makadani sa mga turista sa maong serbisyo.
Nitambong sab maong tigom sila si retired Major General Gilbert Llanto, Chair sa Prime Aces Holdings Corporation (PAHC), ug Captain Jose Commendador, Bise Presidente sa Operasyon sa LEASCOR.
Ang maong tigom agig tubag sa public announcement sa kompanya sa ilang plano nga usbawan ang plitehan ngadto sa P1,888 sa regular nga mga adlaw ug P2,588 atol sa peak holiday seasons, epektibo sa umaabot Nobiyembre 1.
Agig tubag, si Heneral Llanto mipasalig sa pagpabilin sa P888 nga plitehan hangtod sa dugang nga pahibalo.
Ang mga biyahe paingon sa Isla sa Bantayan, nga gihimo kaduha sa usa ka semana, sa Biyernes ug Domingo, sakay sa mga ATR airplane nga adunay kapasidad nga 72 passenger seats.
Kahinumduman nga kaniadtong Agosto 28, ang debut flight sa malampusong pagtugpa sa Bantayan Island Airport, nga nakaputol sa oras sa pagbiyahe paingon sa isla gikan sa siyudad, gikan sa labing menos unom ka oras sa bus ug ferry, ngadto nalang sa 28-minutos nga biyahe.
