CEBU CITY- Nasikop sa National Bureau of Investigation in Central Visayas (NBI-7) ang nagpaluyo sa bomb threat sa Cebu Technological University – Main Campus niadtong Lunes, Oktubre 21, 2024.
Nailhan ang suspek nga si Althea Faith Bordario, 19 anyos, bag-ong nagtungha sa Early Childhood Education sa CTU-MC.
Una niini, kini nagpailang alyas ‘John Steve’, kinsa nag-post ug usa ka ‘bomb threat’ sa Facebook niadtong Oktubre 21, 2024.
Hinugdan nga gipabakwit dayon ang mga estudyante alang sa ilang kaluwasan samtang gisusi sa mga awtoridad ang taho.
Sa pakighinabi sa Bombo Newsteam kang NBI 7 Director Rennan Augustus Oliva, gitino niini nga nasikop ang suspek sa iyahang panimalay sa Barangay Tawason, Mandaue City, niadtong Oktubre 22, 2024.
Gidugang pa niini, nga adunay mga special unit gikan sa Cyber Crime Unit sa kaulohan ang gipadala sa Dakbayan, aron motabang sa ilaha sa pagsulbad sa naasoy nga insidente, hinungdan nga ilahang na-trace ang suspek ug nasikop.
Kini ang una nga higayon sa Dakbayan sa Sugbo, nga nailhan ug nasikop ang usa ka indibdwal nga nagpakatap ug ‘Bomb Jokes’ o ‘bomb threat’ .
Gipahinumdoman niini ang publiko nga ang mga komedya ug hulga sa bomba grabeng mga kalapasan.
Kadtong responsable mahimong mag-atubang ug grabeng mga sangpotanan, lakip ang sentensiya nga pagkapriso hangtod sa lima ka tuig ug multa nga ₱40,000.00, nga nagpasiugda sa legal nga mga sangpotanan nga nalangkit sa maong mga aksyon.
