CEBU CITY-Andam na ang kagamhanan sa Sugbo lakip na ang mga sakop sa kapulisan sa pagpakatap sa liboan ka mga police ug force multipliers sa mga sam-ang alang sa pagpangandam sa hugot nga seguridad sa umaabot nga kalag-kalag.
Matud ni Police Colonel Antonietto Cañete, ang hepe sa Cebu City Police Office nga 100% na nga andam ang ilang sakop diin gisugdan na ang pag-deploy ngadto sa mga gilauman nga dagsaan og mga tawo.
Gisaysay ni Cañete nga ang mga lakang sa seguridad kay mao ang gitutokan karon sa 23 ka mga sementeryo ug tulo ka dagkong lokasyon sa dakbayan.//
Diin anaa sa 2,400 ka mga security personnel ang ipang-butang sa mga sementeryo sa Dakbayan sa Sugbo.
Una niini, mokabat sa 1,000 ka mga polis ug force multipliers ang gipakatap sa mga sementeryo sa dakbayan sa Sugbo sukad niadtong Lunes, Oktubre 28, agi’g pagpangandam sa Adlaw sa mga Santos ug Adlaw sa mga Kalag.
Ang gidaghanon naglakip sa kapin 400 ka mga sakop sa kapulisan sa dakbayan sa Sugbo, 300 ka mga sakop sa Cebu City Disaster Risk Reduction and Management Office (CCDRRMO), Maritime Police, Armed Forces of the Philippines, Road Management Authority (RMA), ingon man ang Bureau of Fire Protection ug mga barangay tanod.
Sama sa naandan, nipahimangno si Colonel Cañete, sa mga gidili nha dad-on sulod sa mga sementeryo sama sa hait nga mga hinagiban, mga ilimnong makahubog ug mga sound system.
Ipatuman usab sa kapolisan ang umaabot nga executive order ni Cebu City Mayor Raymond Garcia nga limitahan ang pagbisita sa sementeryo.
