MANDAUE CITY-Napamatud-an nga sad-an sa kasong graft ug direct bribery ang usa ka empleyado nga gitangtang sa trabaho sa dakbayan sa Mandaue.
Kini human nga nasuta sa Mandaue City Regional Trial Court Branch 84 si Atty. Reynaldo Mayol, kanhi head sa Registry of Deeds nga sad-an sa paglapas sa Republic Act 3019 o ang Anti-Graft and Corrupt Practices Act, ug direct bribery.
Hinungdan, nga si Atty.Mayol gipahamtangan og pagkapriso nga unom ka tuig ngadto sa usa ka adlaw (minimum penalty) ngadto sa walo ka tuig (maximum penalty), ug perpetual disqualification sa serbisyo sa gobyerno.
Sa bahin sa iyang kaso sa direct bribery, gisentensiyahan siya og indeterminate nga pagkabilanggo sulod sa upat ka tuig, duha ka bulan, ug usa ka adlaw (minimum penalty) ngadto sa siyam ka tuig, upat ka bulan, ug usa ka adlaw (maximum penalty).
Dugang pa, nga aduna usab kini multa nga nagkantidad og P450,000.
