Gikompirmar sa Department of Social Welfare and Development (DSWD) Visayas nga nakadawat sila og kapin sa 300-Metric Tons sa donasyon nga bugas gikan sa Japan.
Kini nga donasyon alang sa mga pamilya ug indibidwal nga naapektuhan pag-ayo sa sunodsunod nga mga bagyo ug sa bag-o lang nga El Niño nga miigo sa probinsiya sa Leyte.
Kini nga gidaghanon mokabat sa kapin sa 10,000 ka sako.
Ang Japan Embassy First Secretary ug Agricultural Attache Akasaka Hidenori, ug ASEAN Plus Three Emergency Rice Reserve (APTERR) Secretariat General Manager Choomjet Karnjanakesorn, pormal nga mitunol sa maong bugas ngadto kang Undersecretary sa Disaster Response Management Group (DRMG) Diana Rose S. Cajipe ug bisan si NFA OIC Deputy Administrator Mario G. Granada.
Nipadayag sa iyang kinasingkasing nga pagpasalamat ang representante ni Leyte Governor Jericho Petilla sa kagamhanan sa Japan sa ilang donasyon.
Lakip sa mga benepisyaryo ang mga residente nga apektado sa kalamidad gikan sa mga lungsod sa Capoocan, Calubian, Dulag, Inopacan, Merida, Villaba, Hindang, Bato, Hilongos, ug Palo gikan sa nasangpit nga probinsiya.
