Gipasiugda ni Department of National Defense (DND) Secretary Gilberto “Gibo” Teodoro Jr. ang kamahinungdanon sa panaghiusa, sentralidad ug panaghiusa sa mga nasud sakop sa Association of Southeast Asian Nations (ASEAN) aron mapadayon ang kalinaw ug kalig-on sa rehiyon sa Southeast Asia ug sa mas halapad nga Indo-Pacific region.
Kini atol sa pagtapos sa ika-20 nga ASEAN Defence Ministers’ Meeting (ADMM) ug ika-13 nga ADMM-Plus nga gipahigayon sa Lapu-Lapu City, Cebu.
Sa iyang pamahayag, gipasalamatan ni Teodoro si Presidente Ferdinand “Bongbong” Marcos Jr. tungod sa liderato ug suporta sa pagpalig-on sa kooperasyon sa depensa tali sa mga nasud sakop sa ASEAN ug sa ilang mga dialogue partner.
Gipasalamatan usab niini ang ASEAN Secretariat ug ang mga delegado sa mga nasud nga miapil sa mga miting tungod sa ilang suporta sa pagpangulo sa Pilipinas sa ASEAN ning tuiga.
Matod ni Teodoro, tumong sa Pilipinas nga mapadayon ang mga nahimo nang kooperasyon sa depensa, samtang ipahiangay kini sa nag-usab nga kahimtang sa seguridad sa rehiyon.
Gipahayag usab niini ang pagpasalamat sa ubang nasud sa ASEAN sa ilang suporta sa proseso sa pagmonitor sa ceasefire agreement tali sa Cambodia ug Thailand, subay sa kasabutan sa ilang mga lider.
Samtang, mipasalig ang Pilipinas nga makigtambayayong pag-ayo sa Singapore, nga maoy mosunod nga mangulo sa ASEAN, aron masiguro ang hapsay nga pagbalhin sa pagpangulo ug pagpadayon sa mga paningkamot alang sa malinawon ug malungtarong pagsulbad sa mga panagbangi.
Kabahin sa seremonyas ang pagturn-over sa Manila Declaration alang sa ika-20 nga anibersaryo sa ADMM nga may temang “Navigating Our Future Together,” lakip ang joint statement sa ADMM-Plus kabahin sa kalinaw ug seguridad.
Gihatagan usab og service recognition award ang duha ka opisyal nga adunay mahinungdanong kontribusyon sa operasyon sa mekanismo sa ADMM sulod sa milabayng 20 ka tuig.
