Nipasalig ang Food and Drugs Administration (FDA) nga ilang bantayan ang mga update sa mga tambal nga wala na sa VAT.
Kini human nga nakahatag og kalibog sa publiko ug ubang mga drug manufacturer nga niingon nga ang usa ka tambal dili VAT exempt apan VAT exempt pa kini sa sunod adlaw.
Giklaro ni Atty. Pamela Sevilla, tigpamaba sa FDA nga kanunay nilang gi-update o gisusi ang mga listahan sa mga tambal nga exempted sa VAT.
Matud niya nga tumong sa joint administrative order nga gipirmahan sa nagkalain-laing ahensya nga naglakip sa Department of Health (DOH), Department of Finance (DOF) ug Bureau of Internal Revenue (BIR) mao ang pagsilot niadtong mopahimulos niini.
Hinungdan nga aduna silay delisting diin kung dili makatuman ang mga tiggama, ilang tangtangon ang VAT exemption sa mga tambal nga ilang gilakip sa CREATE MORE Act.
Kahinumdoman nga ang maong VAT exemption sa mga tambal nahimong epektibo diha-diha dayon human nga gipagawas ang FDA advisory niadtong Nobyembre 22 ug napublikar niadtong Nobyembre 26.
Gipahinumdoman ni Sevilla ang publiko nga kung adunay mga pagduha-duha bahin sa pagpalit sa tambal o kawalay kasiguruhan sa mga presyo niini, mahimo ra sila mobisita sa ilang website sa social media.
