ALEGRIA, CEBU-Hingpit nang sugdan ang planong pagpalambo sa Alegria Heritage Park sa habagatang Sugbo human gipirmahan sa mga opisyales sa kagamhanang lungsod ug sa kadagkuan sa St. Francis Xavier Parish ang usa ka Memorandum of Agreement (MOA).
Ang parokya kay gipangulohan ni Cebu Archbishop Jose Palma ug ang kahamhanang lungsod gipasiugdahan ni Vice Mayor Verna Magallon ang paglagdaay sa MOA tungod kay natunga kini nga gipanag-iya sa LGU ug sa simbahan.
Matod pa ni Vice Mayor Magallon nga nagmalaumon sila nga magmalamposon ang ilang pagtambayayong para sa katawhan sa lungsod sa Alegria.
Samtang nibutyag sab si Mayor Gilberto Magallon nga ang Heritage Park dili mahimo nga dili i-formalized ang pagpirmahay ug agreement aron mapadayon ang proyekto nga gitagana sa maong dapit.
Gipadayag ni Mayor Magallon nga adunay mga nakaplano na nga pabarugon sa maong dapit nga magamit sa kabatan-onan.
Ang kura paruko sa St. Francis Xavier Parish nga si Fr. Joselito Gutierrez nitataw sab nga dako niyang kalipay nga malakip sa maong memorable nga event tungod kay ilang gilantaw nga sa habig sa simbahan wala silay dokumento nga makit-an bahin sa Heritage Park.
Nipadayag sab sa iyang bahin si Archbishop Palma sa dako niyang kalipay sa maong kalampusan sa simbahan.
