BADIAN, CEBU-Gitan-aw karon ang duha ka angulo sa kapulisan sa Lungsod sa Badian Municipal Police Station ang gidangatan ni Fortunato Caingles Purgatorio, 54-anyos nga usa ka retiradong pulis kinsang gipusil-patay samtang naglingkod sa terrace sa iyang panimalay sa Barangay Tubod, Badian, habagatang kasadpan sa Sugbo, niadtong Disyembre 22, 2024.
Matud sa hepe sa Badian Police nga unang angulo nga ilang tan-awon kabahin sa iyang trabaho niadting tuig 2015 diin nakasugat kini og problema sa dihang nagsilbi kini og warrant of arrest sa usa ka dakponon.
Samtang ang ikaduha kay padayon pa nga gisubay ug gitapok ang mga posibleng kalambigitan niini.
Kahinumduman nga basi sa imbistigasyon sa kapulisan sa wala pa kini gipusil-patay kay bag-o lang niabot sa ilang balay si Purgatorio sakay sa iyang multicab human namalit og mga grocery sa usa ka department store sa lungsod sa Moalboal.
Samtang naglingkod ug nagpahayahay sa terrace sa iyang balay, nibuto ang mga buto sa armas ug naigo kini ug natumba.
Ingon man nga daling gidala sa Badian District Hospital ug gibalhin sa pribadong tambalanan sa dakbayan sa Sugbo ang biktima apan wala na kini naluwas.
