CEBU CITY- Kadaghanan sa mga hotel sa downtown sa dakbayan sa Sugbo kay anaa sa 90 ngadto sa 100 porsiyento ang na-book samtang nagsingabot ang Sinulog 2025.
Kini ang gitino ni Cebu City Councilor Jocelyn Pesquera, atol sa pakighinabi sa Bombo Newsteam, nga ang siyudad nagtinguha nga maabot ang 80-porsiyento sa mga booking sa mga hotel sa dakbayan sa Sugbo alang sa Sinulog.
Wala kini magtumbok og unsa nga mga hotel, apan gitino niini nga 90-100 porsiyento ang booked sa mga hotel nga duol sa rota sa Sinulog, ilabi na sa palibot sa Ayala Center area.
Samtang, ang ubang mga hotel kay 80 ngadto sa 90 porsyento nga na-book.
Sa miaging 2024, ang Sinulog bookings nagsugod sa pagkuha niadtong Enero, diin ang venue anaa sa South Road Properties alang sa grand ritual showdown ug street parade.
Apan sa pagbalik sa venue ngadto sa Cebu City Sports Center (CCSC), mas sayo nga niabot ang mga bookings kay sa buwan sa Sinulog.
Sa pikas bahin, si Mayor Raymond Garcia nihimo og proactive ug hands-on approach aron masiguro ang kalinaw ug kahapsay sa dakbayan sa Sugbo samtang nagkakusog ang pagpangandam sa Sinulog 2025.
Hinungdan nga nakigtagbo si Garcia sa mga sakop sa Multi-Agency Coordination Center (MACC) sa Social Hall sa Cebu City Legislative Building.
Kini aron masiguro ang luwas ug hapsay nga selebrasyon atol sa Sinulog Grand Parade pinaagi sa pagtutok sa pagpalig-on sa mga lakang sa seguridad, pagdumala sa trapiko ug panon, pag-apil sa komunidad, ug pagpangandam sa emerhensya.
