Misaka ngadto sa P800,000 gikan sa P750,000 ang minimum sponsorship package alang sa mga float nga moapil sa Sinulog Grand Parade 2027, samtang nag-atubang gihapon ang mga contingent sa pagsaka sa gasto sa produksiyon ug panginahanglan sa dugang nga pondo.
Matud ni Elmer “Jojo” Labella, executive director sa Sinulog Foundation Incorporated (SFI), daghan nang kanhing sponsor ang nagpahayag sa interes nga mosuporta pag-usab sa selebrasyon sa sunod tuig. Bisan pa niini, nagpabiling dakong konsiderasyon sa mga contingent ang pinansyal nga kahimtang.
Gipasabot ni Labella nga magpabilin ang sponsorship requirement aron makontrol ang gidaghanon sa mga float ug mas mapahapsay ang dagan sa parada.
Nagsugod na usab ang SFI sa pagdawat sa mga interesadong contingent karong Oktubre, diin gilauman nga molungtad ang rehistrasyon hangtod Nobyembre 30 o Disyembre 1.
Gilauman nga moapil ang mga contingent gikan sa miaging Sinulog ug ang mga grupong misalmot sa Pasidungog sa Sugbo.
Sa Sinulog 2026, gibana-banang mikabat sa 5.2 milyon ang nanambong, samtang mga 40 ka contingent ang miapil, lakip ang mga nakigkompetensiya, guest performers, ug mga grupo gikan sa siyudad ug probinsya.
Bisan misaka ang minimum sponsorship package, magpabiling pareho ang mga premyo ug pinansyal nga tabang alang sa mga contingent tungod kay gipondohan kini sa Cebu City Government.
Magpabiling main venue sa Sinulog 2027 ang Cebu City Sports Center, apan posibleng adunay gagmayng kausaban sa parade route aron malikayan ang paghuot sa pipila ka kritikal nga lugar.
Dili usab makababag sa grand showdown ang problema sa track oval tungod kay magbutang ang mga tig-organisar og plywood aron mapanalipdan kini panahon sa pasundayag.
Gikatakdang ipahigayon ang Sinulog Grand Parade sa Enero 17, 2027, diin gilauman sa mga tig-organisar nga mapadayon ang partisipasyon sa mga contingent ug ang mga pagpauswag nga gipaila sa miaging selebrasyon.
