Nakig-alayon na ang Presidential Anti-Organized Crime Commission sa Philippine Statistics Authority aron mahatagan og birth certificates ang mga bata nga giabandonar sa ilang kaugalingong mga amahan nga nagtrabaho sa gi-raid nga Philippine Offshore Gaming Operator (POGO) hub.
Matod ni PAOCC executive director Gilbert Cruz, nga moabot sa 24 ka masuso ang kasamtangang giatiman sa ahensya.
Diin kining tanan na-rescue gikan sa POGO hubs human sa sunod-sunod nga mga raid sa miaging tuig.
Gawas sa mga masuso, gimonitor usab sa PAOCC ang kahimtang sa tulo ka mga babayeng nagsabak ug gipaabot nga manganak sa mosunod nga mga adlaw.
Usa niini usa ka Vietnamese nga babaye nga giingong nabuntis sa usa ka Chinese POGO worker.
Matod sa opisyal sa PAOCC, kinahanglan usab silang atimanon tungod kay silang tanan biktima sa human trafficking nga gihimo sa POGO operators.
