Gibanabana nga magpadayon ang pagtubo sa ekonomiya sa Pilipinas karong tuiga hangtod sa 2026.
Basi sa pinakaulahing taho sa World Economic Situation and Prospects sa United Nations (UN), ilang gipaabot nga mosaka og 6.1 porsiyento ang gross domestic product (GDP) sa nasod karong tuiga ug moabot sa 6.2 porsiyento sa 2026.
Gitawag ni UN Department of Economic and Social Affairs Officer Zhenqian Huang ang Pilipinas nga usa sa “strongest growth performers” sa mga nasud sa East Asian economies.
Matod niya, dako og tabang ang kusog nga demand sa domestic, public investments ug ang positibong epekto sa mga investment policy reforms, ingon man ang pagtubo sa service sector.
Tungod niini, ang mga projection sa UN karong tuiga magtimaan sa Pilipinas isip ikaduhang labing paspas nga pagtubo sa ekonomiya sa rehiyon human sa Vietnam (6.5%), mas taas sa Cambodia (6%), Malaysia (4.6%), Thailand (3.1% ), ug Singapore (2.6%).
Una nang gipahibalo ni NEDA Secretary Arsenio Balisacan nga mohimo sila og mga lakang aron mapalig-on ang ekonomiya sa nasud.
Apil na niini ang giaprobahan ni Presidente Ferdinand Marcos Jr. nga mga macro-economic target sa Development Budget Coordination Committee (DBCC).
Dugang pa ni Balisacanm nga ang maong mga target sa pag-uswag kay makaseguro sa posisyon sa nasud isip usa sa pinakapaspas nga nagtubo nga merging economies sa Asia Pacific Region.
