CEBU CITY- Sugdan sa Cebu City Transportation Office ang pagsirado sa Osmeña Blvd ug bahin sa dalan B. Rodriguez alang sa Sinulog Grand Parade kay alas dos sa kadlawon sa Domingo, Enero 19, 2025.
Mao kini ang gipadayag ni Atty. Kent Jongoy, ang assistant department head sa CCTO, atol sa usa ka press conference kabahin sa mga traffic plan sa nahabilin nga mga kahilokan sa Sinulog 2025.
Tumong niini aron mahapsay ug ma-accommodate ang mga parking sa mga props gikan sa 45 ka mga contingents.
Matod ni Jongoy nga kung anaa na sa sulod sa carousel route ang mga contingents inig-alas otso sa buntag, ipahigayon na nila ang road closure sa tanang mga dalan nga maagian sa grand parade.
Dugang pa niini nga giaprobahan sa Sangguniang Panlungsod ang usa sa mga rekomendasyon nila nga nag-awhag ug nangayo og tabang sa mga pribadong towing company sa pag-tow sa bisan unsang obstruction sulod sa parade route.
Giklaro usab ni Raquel Arce, ang pangu sa CCTO, nga sila ang mouna og issue sa initial violation ug dili ang towing company, ingon man nga aduna silay gisugyot alang niadtong maglisod na sa paglakaw nga gusto untang moapil sa kalihokan sa Fiesta Senyor.
