LAPU-LAPU CITY,CEBU- Patay ang tulo ka mga tawo samtang usa ang samdan, human ang 40-anyos nga suspek, giingong ubos sa impluwensya sa ilegal nga drugas, nag-amok ug namusil kanila sa Sitio Jagna, Barangay Maribago, dakbayan sa Lapu-Lapu, niadtong Biyernes, Enero 17, 2025.
Ang suspek nga giilang si “Jun-jun,” residente sa maong dapit, nasikop human sa hot pursuit operation.
Gitino ni Police Lieutenant Colonel Christian Torres, tigpamaba sa Lapu-Lapu City Police Office (LCPO), Dead on the spot ang tulo atol sa insidente, kinsa giila nga usa ka 26-anyos nga photographer, usa ka alyas ‘Aying’, ug usa ka babaye nga lending collector.
Samtang, usa ka 30-anyos nga construction worker nga giilang si “Toto” ang samdan ug kasamtangang nagpaalim sa tambalanan.
Matud ni Torres, paturagas ra og pamusil ang suspek sa bisan kinsa nga iyahang makit-an sa dalan,kung diin una nga gipusil niini si Aying.
Human sa pagpamusil, nipauli ang suspek sa ilang panimalay diin nakuhaan sa mga awtoridad ang ilegal nga drugas ug mga drug paraphernalia, lakip ang kalibre .45 nga pistola nga gituohang maoy gigamit sa krimen.
Gibutyag pa ni Torres nga upat ka buwan pa lang nga nakagawas sa prisohan ang suspek, human sa pagserbisyo tungod sa pagkalambigit sa illegal drug trade.
Kasamtangang gitanggong ang suspek sa detention facility sa LCPO, samtang nagpaabot sa pagpasaka og kasong kriminal batok kaniya.
