Gidagan sa tambalan ang piniriso nga Kingdom of Jesus Christ (KOJC) leader nga si Pastor Apollo Quiboloy niadtong adlaw nga Sabado.
Mao kini ang gikumpirmar sa Bureau of Jail Management and Penology (BJMP).
Matod sa tigpamaba sa BJMP nga si Jail Superintendent Jayrex Bustinera, nga si Quiboloy gidala sa Rizal Medical Center (RMC) sa BJMP-Pasig City Jail Male Dormitory mga alas 5 sa hapon niadtong Sabado human nireklamo sa kalisod sa pagginhawa.
Girekomendar sa BJMP Physician nga dad-on kini sa labing duol nga ospital sa gobyerno alang sa tukma nga interbensyon sa medisina.
Matod sa opisyal sa BJMP, girekomendar sa attending physician nga ipa-confine si Quiboloy sa tambalanan ug na-diagnose nga adunay community acquired pneumonia.
Gikompirmar sa opisyal nga pabiling ubos sa kustodiya sa BJMP si Quiboloy ug gipahugtan na usab ang seguridad sa lugar samtang anaa kini sa tambalanan.
Kon kahinumdoman, nag-atubang karon og daghang kaso si Quiboloy lakip na niini ang non-bailable qualified human trafficking, child ug sexual abuse.
