PROVINCE OF CEBU– Walay kalouy nga gitigbas hangtod mamatay sa usa ka lalaki ang iyang kaugalingong asawa ug duha ka anak sulod sa ilang panimalay sa Purok Kamangahan, Barangay Lutac, sa dakbayan sa Naga sa habagatang Sugbo pasado alas 10 sa buntag sa adlaw nga Lunes, Enero 27, 2025.
Giila ang mga biktima nga sila Junelyn Jimenez, 32-anyos ug duha ka anak niini nga si John Carlo Camporedondo, 11-anyos, ug LJ Camporedondo, 2-anyos.
Samtang ang suspek kay giilang si Carlo Camporedondo nga sa kasamtangang nagpabiling gawasnon human miikyas pagkahuman sa panghitabo sa krimen.
Sa inisyal nga kasayuran kay nasuta nga gitigbas gamit sa usa ka sundang sa maong krimen ang suspek dayon mitungas sa kalasangan sa bukid sa maong lugar diin gitumbok nga nagtago-tago kini.
Milusad na og manhunt operation ang Naga City Police Station batok sa suspek inubanan sa pakigtambayayong sa lokal nga opisyales sa Barangay Lutac.
Pipila ka mga taho sa mga kasilinganan niini nga ang maong magtiayon kay kanunay nang nagsigeg lalis sa wala pa masuta nga rason.
Usa sa mga gipanglantawan niini kay ang suspek posibling impluwensiyado sa ginadiling drugas tungod sa nakalabay kay gikan kini sa usa ka rehabilitation center.
