Duha ka lalaki ang nakalas human mabangga sa usa ka naka-parking nga multicab van ang motorsiklo nga ilang gisakyan sa National Highway sa Barangay Tuyan, Naga City, pasado 2:40 sa kaadlawon niadtong Domingo, Agosto 30.
Giila ang mga namatay nga sila si alyas “Mar,” driver, 25-anyos, residente sa Barangay Inayagan, ug ang iyang pasahero, si alyas “Mark,” 30-anyos, residente usab sa samang barangay.
Base sa inisyal nga imbestigasyon sa Naga City Police Station nagpakita nga ang mga biktima gikan sa Tangke padulong sa Barangay Inayagan sa dihang ang ilang motorsiklo nabangga sa likod sa usa ka naka-parking nga multicab van.
Matud sa mga kapulisan nga ang multicab naka-parking sa daplin sa highway padulong sa Cebu City, samtang gikataho ang drayber sa motorsiklo ug ang angkas niini nga hubog ug giingong kusog ang dagan sa wala pa ang aksidente.
Tungod sa impact gikataho nga nalabay ang duha ka lalaki sa dalan, hinungdan sa grabeng mga samad.
Dali silang gidala sa Naga City Infirmary apan gideklarar nga dead on arrival sa doktor.
Matod sa pulis, wala sa lugar ang drayber sa nakaparada nga multicab sa dihang miabot sila.
Nagpadayon usab ang imbestigasyon sa Naga City Police Station aron mahibal-an ang mga sirkumstansya nga naglambigit sa grabe nga aksidente.
