SAN FERNANDO, CEBU-Napalgang patay ang usa ka inahan ug anak niini nga 3-anyos nga babaye sulod sa ilang gipuy-an nga barong-barong sa Purok Tamsi, Brgy. Balud, Lungsod sa San Fernando pasado alas 10 sa gabie, Enero 28, 2025.
Giila ang inahan nga si Marites Cabaluna, 41-anyos, kanhi katabang, ug lumad nga taga Minglanilla, inubanan sa iyang anak nga si Ajalia, 3-anyos, nga gideklarar nga dead on arrival sa tambalanan sa Carcar City.
Basi sa initial nga taho nga katapusang nakit-an ang biktima alas 6 sa gabie nga nakig-inom pa sa iyang suod nga higala nga si Dorlyn Cabillo, ug lain pa nga kauban.
Nasayran usab nga mibahad ang biktima nga magkutlo sa iyang kinabuhi kung dili siya pabalikon sa unang gipuy-an, kinsa maoy temporaryong misagop sa mag-inahan tungod kay buwag kini sa kapuyo nga nagpuyo usab sa naasoy nga dapit.
Sa dihang gibisita sa iyang amiga nga si Dorlyn ang biktima aron susihon ang kahimtang sa anak, apan wala na’y kinabuhi nga naabtan si Marites ug ang 3-anyos nga bata, ingon man nga gitabang pa ang bata pinaagi sa pag-CPR ug misuka og color green ug daling gidala sa tambalanan sa Dakbayan sa Carcar apan dead on arrival na kini.
Padayon gihapon ang imbestigasyon sa San Fernando Police Station diin ilang gipalawman ang imbistigasyon sa pagtumbok sa hinungdan sa ilang kamatayon.
Samtang, anaa na sa posesyon sa SOCO ang botelya sa tubig sa mga biktima nga padayon gisusi sa kapulisan.
Wala pay kumpirmasyon nga adunay foul play sa mao nga krimen.
